القائمة الرئيسية

الصفحات



قلم.. سناء عقل..
فى كل مرة فى حياتى كنت بمر بظروف صعبه، كنت بحاول على قد ما اقدر اتغلب عليها أو بمعنى أصح اكون أقوى منها، خوف منى انها تغلبنى وتكسرنى، فى كل مرة كنت بخرج من التجربه أقوى مما كنت أتخيل ممكن اقول انى بقيت حد تانى خالص مختلف عن سناء اللى اعرفها من 6 سنين ولو هحدد اكتر من سنتين، بس يمكن كان أكبر تحدى قابلنى في حياتى هو انى اسيب مكاني في شغلى اللى بنيته وتعبت فيه واحدة واحدة، المكان ده اخد من اعصابى ومن وقتى، ووقت بيتى فوق ما اى حد يتخيل، لمجرد أن كان جوايا حلم من يوم ما دخلته، ونفسي احققه، وبفضل ربنا حققته، عشان كدا كان أصعب قرار، أو بمعنى أدق أصعب تحدى في حياتي واللى اعتبرته تحدى لنفسي أن اسيب المكان اللي عشقته كابنى، واروح أبدأ من جديد بعد العمر ده فى مكان تانى من اول و جديد، يعنى بنى جديد محتاج مجهود عشان أقف على أرض صلبه تانى، مكانش فيه قدامى غير انى اخد قرار البعد لانى كنت وقتها بين خيارين، لاما اطاطى للريح واقول نعم و حاضر من غير ما ارفع عينى زى ما كتير وقتها نصحنى، أو انى أنفذ وصية ابويا رحمة الله عليه انى مركعش غير لربنا، مهما كان التمن، لأنه مهما كان غالى مش هيكون أغلى من عزة النفس اللى مش هتقدرى تعوضيها تانى لو ضاعت منك، فكرت، واخترت، و توكلت على من لا يضل من توكل عليه، وبدأت تانى من اول و جديد، و نجحت، ورجعت تانى أقف برجلى على أرض صلبة وانا رافعه راسي للسما، ومش موطياها للأرض ، انا عارفه انكم بتسألوا دلوقتي ليه انا بقول كل ده ليكم، عشان جت لى رسايل كتير، بأن العمر عدى، ومفيش فيه بقيه عشان تعافروا في الدنيا، وناس تانيه واقفه مكانها ورافضه تتحرك عشان شايفه انه مفيش فايده وان الدنيا ماشيه كلها بالتطبيل، وأنهم لازم يعملوا كدا ويقولوا نعم و حاضر لولى نعمتهم، ونسيوا أن ولى النعمه هو اللى خلقهم، وان الأمر كله بايده مش بأيد عبد زيهم،
اه نسيت اقول حاجه او بمعنى أصح،نسيت  أوجه شكر لكل شخص، طاقه سلبيه، شخصية استغلاليه، كل اللى حاول يقتل حلمى جوايا، يقلل منى، من شغلى يهدم في على قد ما يقدر  ، شكرا جزيلا ، حقدك كان سلم ساعدنى انى اطلع وكل ما افتكرك ابص ورايا و اصمم انى اكمل،
خلاصة الحكايه.. دور على نفسك ونميها عشان هى تستحق فعلا انك تلاقيها.. اقولكم.. مساء الفل
هل اعجبك الموضوع :

تعليقات